విగ్రహామా! భవిష్యత్తు నీదే!!

ఆంధ్రజ్యొతి  పేపర్లో  విగ్రహాల  కూల్చివేత  గూర్చి  రంగనాయకమ్మ  రాసిన  ఆర్టికల్  చదువుతున్నాను. వ్యాసం  రంగనాయకమ్మ  రాసినట్లుగా  లేదు! చప్పగా  ఉంది. బాలేదు.

"రవణ మావా! కాఫీ. అర్జంట్." అంటూ  సుడిగాలిలా  లోపలకొచ్చాడు  సుబ్బు.

"కూర్చో  సుబ్బు! తెలుగు జాతంతా  విగ్రహాల విధ్వంసం  గూర్చి  సతమతమైపోతుంది. నువ్వు  మాత్రం  కాఫీ  తప్పితే  దేన్నీ  పట్టించుకోవు. కొద్దిగా  సీరియస్ గా  ఆలోచించు  సుబ్బు!"

ఒక్క  క్షణం  ఆలోచించాడు   సుబ్బు.

"సీరియస్ గా  చెప్పనా? అయితే  విను. విగ్రహాల  కన్నా  మనుషులు  ముఖ్యం. ఈ  రోజుకీ  ఆకలి చావులకి  నిలయమైన  మన  సమాజానికి  ఈ  పరమ పవిత్ర  విగ్రహ సంస్కృతి  అవసరమా? లక్షలు  వృధా  చేసి  విగ్రహాలు  ఏర్పాటు  చెయ్యటం  దండగ. మానవసేవే  మాధవసేవ  అన్నారు. ఇప్పుడు  విగ్రహసేవే  మానవసేవ  అంటున్నారు. అందుకే  ఇప్పుడు  మనకి  శ్రీశ్రీ  గూర్చి  లగడపాటి  పాఠాలు  చెబుతున్నాడు. సమాజానికి  శ్రీశ్రీ  రిలవెంట్  అయితే  మహాప్రస్థానం  నిలబడుతుంది. లేకపోతే  మహాప్రస్థానంతో  బాటు  శ్రీశ్రీ  కూడా  కాలగర్భంలో  కలిసిపోతాడు. పని గట్టుకుని  ఎన్టీఆర్  దాతృత్వంతో  శ్రీశ్రీ  లెగసీని  టాంక్ బండ్  ఫై  పోషించనేల? పూర్వం  పుస్తకాల  నుండి  కవుల  గొప్పదనం  గుర్తించేవాళ్ళం. ఇప్పుడు  విగ్రహాల  ద్వారా  గుర్తిస్తున్నాం. టాంక్ బండ్  విగ్రహాల్ని  కూల్చేసినప్పుడు  కొందరు  గుండెలు  బాదుకున్నారు. వాళ్ళ  ఇళ్ళల్లో  మనుషులు  చచ్చినా  అంతకన్నా  ఏడుస్తారని  అనుకోను. ఆ  ఏడ్చిన వాళ్ళల్లో  చాలామందికి  ఆ  కూలిన విగ్రహాలు  ఎవరివో  కూడా  తెలీదు."

ఇంతలో కాఫీ  వచ్చింది.

"మరీ  ఆర్.నారాయణమూర్తి  టైపు  ఆవేశం  వద్దు. కొద్దిగా  ప్రశాంతంగా, పెద్ద మనిషిలా  చెప్పు. చాలు." అన్నాను.

"అయ్యో! దానికేం  భాగ్యం! పరమ ప్రశాంతంగా  చెబుతా. విను. ఈ  విగ్రహాలనేవి  ఒక  ప్రాంతానికీ, కాలానికీ  సంబంధించిన  సాంఘిక, రాజకీయ భావాల  ఆధిపత్య  ప్రదర్శన. పుస్తకాల్లో  లిఖించబడే  చరిత్ర  వలే  విగ్రహాలు  కూడా  శిల్పులతో  చెక్కించబడే  చరిత్ర. స్టాలిన్, సద్దాం  విగ్రహాలు  ఇందుకు  ఉదాహరణ. రాజ్యాధికారం  మారినప్పుడు  ఈ  విగ్రహాలు  సహజంగానే  నేలకొరుగుతాయి. బుద్దుణ్ణి  కూలగొట్టే  ధ్వంస రచన  చేసిన  తాలిబన్లు  అప్పటి  దేశ రాజకీయ భావాల్ని  చరిత్రలో  లిఖించారు." కాఫీ  సిప్  చేస్తూ  అన్నాడు  సుబ్బు.

"సుబ్బు! మాలతి చందూర్  లాగా అర్ధం  కాకుండా  అంతర్జాతీయ స్థాయిలో  మాట్లాడుతున్నావ్. కొంచెం  ప్రజల భాషలో  చెప్పవా? ప్రస్తుతం  ఆంధ్రాలో  నడుస్తున్న  విగ్రహల గోల  గూర్చి  మాట్లాడు." చికాగ్గా  అన్నాను.

"నువ్వడిగేది  తెనాలి  విగ్రహాల  సంగతేనా? దాని  గూర్చి  మాట్లేదేముంది! పాపం.. ఆ  కూల్చేసేవాళ్ళకి  'రంగా  బొమ్మని  కూల్చండి.'  అని  చెప్పి  పంపారు. అసలు  ఆంధ్ర దేశంలో  ఇద్దరు  రంగాలున్నారన్న  సంగతి  చాలా మందికి  తెలీదు. అందుకే  కూల్చటానికి  ఏ  రంగానయితేనేం  అనుకుని  శత్రుశేషము  రంగాశేషము  లేకుండా.. రెండు  రంగా విగ్రహాల్నీ  పడేసిపొయ్యారు. కాబట్టే  మన  ఏరియాలో  సంకుల సమరం  తప్పింది. వాళ్ళకి  సామాన్య ప్రజానీకం  తరఫున  నా  కృతజ్ఞతలు."

కళ్ళు  మూసుకుని  నిదానంగా  మాట్లాడటం  మొదలెట్టాడు  సుబ్బు.

"నేనిప్పుడు  Nostradamus ని. భవిష్యత్తు  చెబుతున్నాను  విను. రాబోయే  కాలంలో  విగ్రహలు  తయారు చేసే  శిల్పుల  కోర్స్ లకి   యూనివర్సిటీ  స్థాయిలో  ఎంట్రన్స్  పరీక్ష  నిర్వహించబోతున్నారు. అందుకోసం  శ్రీ చైతన్య, నారాయణ విద్యా సంస్థలు  కోచింగ్  ఇస్తాయి. సాఫ్ట్ వేర్  నిపుణులు  శిల్పి వేర్  నిపుణులుగా  మారబోతున్నారు. ప్రస్తుతం  ఉన్న  విగ్రహాల  ముక్కు  మొహాలు  ఏవో  చలిమిడి ముద్దల్లా  ఉన్నాయి. అస్సలు  బాగా లేవు. అందుకే  విగ్రహాల తయారి నిపుణతని  పెంచుకోటానికి  Madame Tussauds  museum  వాళ్ళని  సాంకేతిక సలహాదారులుగా  నియమించబోతున్నారు. "

"కాఫీలో  ఏదో  కలిసింది. తేడాగా  మాట్లాడుతున్నావ్."

"పిచ్చివాడా! భవిష్యత్తంతా  విగ్రహాల  కూల్చివేతలదే!. ప్రతి  కులానికి, ఉప కులానికి, భాషకి, భాషలో  వివిధ  యాసలకి, మతానికి, ప్రాంతానికి, ఉప ప్రాంతానికి, వృత్తికి..... అన్ని రకాలకి  ఒక్కో  వ్యక్తి  విగ్రహం  సంకేతంగా  నిలబడబోతుంది. ప్రభుత్వాలు  మారినప్పుడూ, మరనప్పుడూ.. ధరలు  పెరిగినప్పుడు, ఉద్యోగం  పోయినప్పుడు, భార్య  తిట్టినప్పుడు, కూరలో  ఉప్పు  తగ్గినప్పుడు.. ఇట్లా  ప్రతి  సందర్భానికి  విగ్రహాలు  పడేస్తూ ఉంటారు. అన్నింటికీ  ఆత్మగౌరవమే! మనుషులంతా  విగ్రహాల  వారిగా  విడిపోయి  తన్నుకు చస్తుంటారు. ఎదుటి వాడి  విగ్రహ విధ్వంసం.. ఆపై  తమ  విగ్రహాలకి  ఇరవై నాలుగ్గంటలూ  కాపలా."

"సుబ్బు! interesting. carry on my boy!"

"యుద్ధాలు  కూడా  విగ్రహాల  ఆధారంగానే  జరుగుతాయ్. మెదక్ లో  గురజాడ  విగ్రహ  ముట్టడి. ప్రతిగా  విశాఖలో  కాళోజీ  విగ్రహ ముట్టడి. బందీలైన  విగ్రహాలు  గజ గజ. hostage  crisis. టీవీ లలో  లైవ్  షో. sms లు. టాక్  షోలు. ఉద్రిక్త పరిస్థితులు. పోలీస్  లాఠీ చార్జ్. కాల్పులు. హాహాకారాలు. మృతులు. నష్ట పరిహారాలు. తీవ్రమైన  చర్చల  అనంతరం  ఒక  రాజీ మార్గం. మేం  గురజాడ  తలపాగా  ఎగరకొడతాం. మీరు  కాళోజీ  గడ్డాన్ని నరుక్కోండి. ప్రశాంతత  నెలకొనడానికి  చర్చల  ద్వారా  తీవ్ర  కృషి  చేసిన  కేసీఆర్, బొత్స  కొడుకులకి   ధన్యవాదాలు."

"రోజూ  ట్రాఫిక్ జామ్ లన్న  మాట!"

"ఇంకెక్కడి  ట్రాఫిక్! ప్రజలు  ఊళ్లు  ఖాళీ  చేసి  పొలాల్లో  గుడారాలు  వేసుకుని  నివసిస్తుంటారు. కూల్చబడ్డ  విగ్రహాలకి  పాలాభిషేకం  కోసం, పున:ప్రతిష్ట  కోసం  చందాలిచ్చే  గొర్రెలుగా  మారిపోతారు. నగరాలన్నీ  ఖాళీ. నిర్మానుష్యం. వీధులన్నీ  వేల, లక్షల  విగ్రహాలు. కాపలాకి  ప్రైవేట్  సైన్యం. పాలిచ్చే  గేదెల్ని  మాత్రమే  బ్రతకనిస్తారు. ఎందుకంటే  అభిషేకం  కోసం  పాలు  అవసరం  కాబట్టి! కుక్కలు, కాకులు  కూడా  చంపబడతాయ్!"

"మధ్యలో ఆ  మూగజీవులు  ఏం  చేశాయి?"

"నీకన్నీ  విడమర్చాలి. కుక్కలు  కాలెత్తి  విగ్రహాల్ని  అపవిత్రం  చేస్తాయి. కాకులకి  విగ్రహాల  తలలంటే  భలే  ఇష్టం. అందుకే  వాటిని  commode గా  వాడుతుంటాయ్. అందుకని."

"సుబ్బు! బాగుంది."

"టీవీ  ప్రకటనలు. పెద్ద  బాంబ్  ప్రేలుడు. మంటల  మధ్య  చెక్కు  చెదరని  ఒక  విగ్రహం. పొగల్లోంచి  బయటకొచ్చి అక్కినేని అఖిల్  ఎనౌన్స్ మెంట్. 'మా  కంపెనీ  తయారు చేసిన  విగ్రహమే  కొనండి. ఇది  rdx  తో  కూడా  బద్దలవదు.' అంటూ. విగ్రహ తయారీకి  ప్రత్యేక సిమెంట్  తెప్పించాలని  కేబినెట్  నిర్ణయం. విగ్రహాల  తయారీలో  అవినీతి  అంతం  చెయ్యాలని  అన్నూ బక్రాలే  రాం లీలా  మైదానంలో  నిరాహార దిక్ష. వెంటనే  ప్రియాంక గాంధి  కొడుకుతో  చర్చలు." అంటూ  ఖాళీ  కప్పు  టేబుల్  మీద  పెట్టాడు.

"సుబ్బు! నీ  ఇమేజినేషన్  అదిరింది."

"గాడిద గుడ్డేం కదూ! జార్జ్  ఆర్వెల్  రాసిన  1984  స్పూర్తితో.. విల్ స్మిత్  సినిమా 'I Am Legend'  back drop గా.. జాక్ లండన్  రాసిన  ఐరన్ హీల్  climax  ని  వినిపించాను. అంతే!" అంటూ  టైం  చూసుకున్నాడు.

"ఔరా! copy cat! " అన్నాను.

"మధ్యలో  పిల్లులేం  చేశాయి  పాపం!" అంటూ  నవ్వుతూ  హడావుడిగా  నిష్క్రమించాడు  సుడిగాలి సుబ్బు!