దొంగ

ఆ యువకులిద్దరూ బాగా చదువుకున్నవారు. చాలాకాలంగా స్నేహితులు. అయితే ఇప్పుడు రాష్ట్రంలో నిత్యం కలహించుకునే రెండు రాజకీయ పార్టీల అభిమానులుగా విడిపొయ్యారు. అందువల్ల వారిమధ్య రాజకీయంగా తరచూ వాదప్రతివాదనలు చోటు చేసుకుంటున్నాయి. 

ఇవ్వాళ కూడా (రోజూలాగే) ఇద్దరి మధ్యా చర్చ చిన్నపాటి వాదనగా మొదలై పెద్దపాటి కేకలు, అరుచుకునే స్థాయిదాకా వెళ్ళింది.

"మీ నాయకుడు అధికారాన్ని అడ్డు పెట్టుకుని లక్ష కోట్లు కాజేశాడు."

"మీ నాయకుడు మాత్రం తక్కువా? రెండు లక్షల కోట్లు కాజెయ్యలేదా?"

"మా నాయకుడికి రాష్ట్ర అభివృద్దే ఊపిరి."

"మా నాయకునికి ప్రజల సంక్షేమమే జీవనం."

స్నేహితులిద్దరూ ఒకరి చొక్కాలు ఒకరు పట్టుకున్నారు.

ఇంతలో "దొంగ! దొంగ!" అంటూ అరిచారెవరో. స్నేహితులిద్దరూ తల తిప్పి అటుగా చూశారు.

ఎదురుగా పెప్సీ తాగుతున్న నడివయసు బట్టతల పెద్దమనిషి. అతని జేబులోంచి పర్స్ కొట్టే ప్రయత్నం చేస్తున్నాడు ఓ కుర్రాడు. పెప్సీ బట్టతల ఆ కుర్రాడి చెయ్యి గట్టిగా పట్టేసుకుని 'దొంగ దొంగ' అంటూ అరుస్తున్నాడు.

స్నేహితులిద్దరూ క్షణంలో దొంగని దొరకబుచ్చుకున్నారు. ఆ దొంగకి సుమారు పదహారేళ్ళు ఉండొచ్చు. నల్లగా, సన్నగా వెదురుబద్దలా ఉన్నాడు. మాసిన చొక్కా, చింపిరి జుట్టు. మన హీరోల పట్టు విడిపించుకోడానికి గిలిగిలలాడుతూ మెలికలు తిరిగిపోతున్నాడు.

స్నేహితులిద్దరూ ఆ పక్కనే కొబ్బరి బొండాలు అమ్మేవ్యక్తి దగ్గర కొబ్బరి తాడు తీసుకున్నారు. దొంగ పెడరెక్కలు వెనక్కి విరిచి రోడ్డు వారాగా ఉన్న కరెంటు స్తంభానికి కట్టేశారు.

ఇంక విడిపించుకోలేనని గ్రహించిన దొంగ "అన్నా! వదిలెయ్యన్నా! ఇంకెప్పుడూ చెయ్యనన్నా! నీ కాల్మొక్తా అన్నా!" అంటూ ఏడవసాగాడు. ఈ లోపు చుట్టూతా పెద్ద గుంపు తయారయ్యింది.

ఎర్రటి ఎండ. తారు రోడ్డు పెనంలా కాలిపోతుంది. కరెంటు స్తంభం నిప్పుల కొలిమిలో కాల్చి తీసినట్లు మండిపోతుంది. ఎవరో దొంగ చొక్కా, పేంటు చింపేసారు. చిరుగుల డ్రాయర్ అతగాడి నగ్నత్వాన్ని కప్పలేకపోతుంది.

స్నేహితులిద్దరూ దొంగపై పిడిగుద్దులు కురిపించారు. కొద్దిసేపటికి చేతులు నొప్పెట్టాయి. మోకాళ్ళతో దొంగ డొక్కల్లో కుమ్మారు. కొద్దిసేపటికి మోకాళ్ళు నొప్పెట్టాయి. అంచేత ఎగిరెగిరి కడుపులో తన్నారు.

ఈ దృశ్యానికి ఉత్తేజితులైన ఇంకొందరు యువకులు కూడా దొంగని తన్నటం మొదలెట్టారు. అటుతరవాత దొంగని తన్నే పవిత్రకార్యానికి వారిలో పోటీ మొదలైంది. గుంపుగా తన్నారు. వంతుల వారిగా తన్నారు.

కొద్దిసేపటికి దొంగ కళ్ళు తేలేశాడు. నోట్లోంచి నెత్తురు కారసాగింది. ఇంకొద్దిసేపటికి తల వాల్చేశాడు. శరీరం మాంసం ముద్దలా ఎర్రగా మారిపోయింది.

ఇంతలో పోలీసులోచ్చారు. ఈ దేశంలో చట్టం తన పని తను చేసుకుపోతూనే ఉంటుంది. అందుచేత చట్టబద్దులైన పోలీసులు దొంగ కట్లిప్పదీశారు.

దొంగ రోడ్డుమీదగా వాలిపోయ్యాడు. చచ్చాడా? చచ్చే ఉంటాళ్ళే. ఇట్లాంటి దొంగవెధవలు బ్రతికి ప్రయోజనమేమి.. పరుల సొత్తు దోచుకోవడం తప్ప! మనది పుణ్యభూమి. ఇచ్చట దొంగతనం మహాపాపం.

స్నేహితులిద్దరికి సంతోషంగా ఉంది. బాధ్యత కలిగిన పౌరులుగా సమాజానికి సేవ చేసినందుకు ఆనందంగా ఉంది. ఈ దేశంలో అందరూ తమలా నేరం చేసినవాడికి శిక్ష పడేట్లు చేస్తే నేరాలే ఉండకపోను!

దొంగని శిక్షించడంలో అలిసిన స్నేహితులిద్దరూ ఆ పక్కనే ఉన్న హోటల్లో వన్ బై టూ టీ తాగుతూ మళ్ళీ కబుర్లలో పడ్డారు.

"మా నాయకుడు ప్రజాధనం దోచుకుంటే మాత్రం తప్పేంటి? అందులో కొంత ప్రజాసంక్షేమానికే ఖర్చు చేశాడుగా."

"మా నాయకుడు మిక్కిలి నిజాయితీపరుడు. ఇతరులెవ్వరినీ దోచుకోనివ్వడు."

ఈ విధంగా తమ కబుర్లు కొనసాగిస్తూ ఇంటిదోవ పట్టారు.

(photo courtesy : Google)