పాతపాట పాడుతున్న కొత్తప్రభుత్వం

విదేశీ బ్యాంకుల్లో మన బడాబాబులు టన్నుల కొద్దీ సొమ్ము దాచుకున్నారనీ, ఆ సొమ్ముని అణాపైసల్తో కక్కిస్తానని నరేంద్ర మోడీగారు ఎన్నికల ప్రచారంలో గర్జించారు. ఆ డబ్బంతా కాంగ్రెస్ పార్టీ దొంగలదేననీ, కావునే - కాంగ్రెస్ పార్టీ దొంగవేషాలేస్తుందని కూడా వాకృచ్చారు. ప్రజలు కూడా నిజమేనని నమ్మారు. 

దేశభక్తులు (అనగా మోడీ భక్తులు. దేశం, మోడీ అనేవి వేరువేరు పదాలు కాదు - 'దేశం' అంటేనే మోడీ) ఆ డబ్బుతో మనం చెయ్యాల్సిన అభివృద్ధి పనుల చిట్టా కూడా రాసుకున్నారు. ఇక విదేశీ నల్లధనం తరలి రావడమే తరువాయి అన్నట్లు ఆత్రుతతో ఎదురు చూస్తుండగా - కేంద్రప్రభుత్వం వారు సుప్రీం కోర్టుకి 'ఆ నల్ల కుబేరుల పేర్లు చెప్పలేం' అంటూ సెలవిచ్చారు. 

అలా చెప్పలేకపోవడానికి కారణాల్ని కూడా సదరు మంత్రివర్యులు చెప్పుకొచ్చారు. ఎప్పుడో ఇరవైయ్యేళ్ళ క్రితం దుష్ట కాంగ్రెస్ జర్మనీవాడితో ఏవో పెద్దమనుషుల ఒప్పందాలు చేసుకుని కాయితాల మీద సంతకం పెట్టిందిట. అదేదో డబుల్ టేక్సేషన్‌ట! మనకి సింగిల్ టేక్సేషన్ గూర్చే సరీగ్గా తెలీదు! ఇట్లాంటి అంతర్జాతీయ పవిత్ర ఒప్పందాల్ని అర్ధం చేసుకోవాలంటే - వయోజన విద్యాకేంద్రాల్లో చేరాల్సిందే!

కొన్నాళ్ళ క్రితం కాంగ్రెస్ పార్టీ కూడా ఇదే పాట పాడింది. ఆ పార్టీ దేశ ప్రజల ప్రయోజనాల కన్నా అంతర్జాతీయ ఒప్పందాలే మిన్న అని నమ్మింది. అందుకే ఆ పార్టీని ప్రజలు చెత్తబుట్టలో పడేశారు. మరప్పుడు ఆనాడు మోడీగారు నల్లధనం తెప్పిస్తామని ఎందుకు బల్ల గుద్దారు? 'మేం దొంగల పేర్లు చెబితే అంతర్జాతీయంగా మన పరువు పోతుంది' అన్న కాంగ్రెస్ పల్లవి బీజేపీ కూడా ఎందుకు పాడుతుంది? 

'మంచిరోజులు వచ్చాయి' - ఈ పేరుతో ఒక తెలుగు సినిమా వచ్చింది. ఇదే పేరుతో కేంద్రంలో కొత్త ప్రభుత్వం కూడా వచ్చింది. అయితే - నటులే మారారు తప్ప సినిమా పాతదే అనే అనుమానం ఎవరికైనా వస్తే - వారంతా దేశద్రోహులే! 

గత కాంగ్రెస్ ప్రభుత్వం ప్రజల పట్ల - హుధుద్ తుఫాను కన్నా తీవ్రమైన నష్టాన్ని కలగజేసిందనీ, ఆ నష్టాన్ని చక్కదిద్దడంలోనే పీకల్దాకా (ఇంకా) మునిగిపోయి వున్నామనీ కొత్త ప్రభుత్వం చెబితే వినేవారు వినవచ్చుగాక, నమ్మేవారు నమ్మవచ్చుగాక! అయితే - ఇలా ఎంత కాలం?

ముగింపు - 

మన ప్రభుత్వాన్ని విమర్శిస్తున్నాడు! ఎవడీ దేశద్రోహి?

వీడికి పన్లేదు సార్! ఆ విషయం అందరికీ తెలియాలనే - 'పని లేక.. ' అంటూ ఏవో చెత్తరాతలు రాస్తుంటాడు. 

అలాగా! వీడికి మన 'స్వచ్ఛ భారత్' కార్యక్రమం గూర్చి తెలీనట్లుంది. ఒక చీపురు తీసుకొచ్చి వీడి మొహాన కొట్టండి. రోడ్లన్నీ శుభ్రంగా ఊడిపించండి. ఫినాయిల్తో పాకీదొడ్లు కడిగించండి. 

అలాగే సార్! కానీ - నడుం విరిగి చస్తాడేమో?

మరేం పర్లేదు! అప్పుడు 'నడుం లేక.. ' అని రాసుకుంటాడు!

(picture courtesy : Google)