Sunday 23 October 2011

సినిమాలు మంచివే! కానీ మనం?


'సినిమాల్లో చెడు ఉండరాదు, బలహీన మనస్తత్వం కలవారు చెడిపోతారు.'

ఇది నేను నా చిన్నప్పట్నించీ వింటున్న సుభాషితం. ఓకే! ఒప్పుకుంటున్నా. ఇప్పుడు అట్టు తిరగేద్దాం. మరి - సినిమాల్లో మంచిని చూసి బాగుపడినవాళ్ళు ఎందరున్నారు? ఫలానా సినిమాలో ఫలానా పాయింటు నాకళ్ళు తెరిపించింది. కావున - ఫలానా విధంగా నా ఆలోచనా విధానాన్ని మార్చుకున్నాను, ప్రవర్తిస్తున్నాను. అన్నవాళ్ళు  మీకెక్కడైనా కనిపించారా? నాకైతే కనిపించలేదు.

'దేవదాసు'లో ఎస్వీరంగారావు - అంతస్తు తక్కువ పిల్లని చేసుకుంటే తుపాకీతో కాల్చుకు చస్తానని బెదిరించి మరీ నాగేశ్వర్రావుని సావిత్రి నుండి వేరు చేస్తాడు. ఆ తరవాత దేవదాసు, పార్వతిలు తెలుగువాళ్ళని దారుణంగా ఏడిపించారు. అరవైయ్యేళ్ళ క్రితం ఈ ఫార్ములా సూపర్ హిట్టు. కానీ ఈరోజుకీ తమ పిల్లలు దేవదాసు, పార్వతిల్లా భ్రష్టుపట్టిపోతారనే భయంతో  పిల్లల ప్రేమవివాహాలు ఒప్పుకునే దయార్ధ్ర హృదయులు నాక్కనిపించట్లేదు.
                             
నా చిన్నప్పుడు అమ్మ, పక్కింటి పిన్నిగారితో కలిసి ఎన్నో ఏడుపుగొట్టు సినిమాలు చూశాను. 'అన్నా! నీ అనురాగం' అంటూ గుండెలు పగిలే గుడ్డి చెల్లెలి ఆక్రందనల్ని ఎర్రటికళ్ళతో, మొహం వాచిపోయేలా బిగ్గరగా రోదిస్తూ సినిమాని చూశారు పిన్నిగారు. ఇంటికెళ్ళంగాన్లే బండెడు ఇంటి చాకిరీ సరీగ్గా చెయ్యలేదని తన విధవాడపడుచుని ఇల్లెగిరిపొయ్యేలా కేకలేసింది!

శారద నటించిన 'మనుషులు మారాలి'  సినిమా తెలుగువాళ్ళ హృదయాన్ని పీల్చి పిప్పి చేసింది. శోభన్ బాబు హత్య, ఆపై శారద దుర్భర దరిద్రాన్ని తట్టుకోలేక తన పిల్లల్ని చంపేసుకోవటం.. నాకు తెలిసి తెలుగులో ఇంతకన్నా సీరియస్ సినిమా మరోటి లేదు. జనాలు విరగబడి చూసి యేడ్చేశారు. ఆ సినిమా విజయవంతమై నిర్మాతలకి కాసులు తెచ్చింది గానీ జనాల్లో మార్పు తేలేకపోయింది. 

'రోజులు మారాయి'లో దళిత వర్గానికి చెందిన షావుకారు జానకిని వ్యవసాయ వర్గానికి చెందిన నాగేశ్వర్రావ్  ప్రేమించి పెళ్ళి చేసుకుంటాడు. ఈ దళిత అగ్రవర్ణాల పెళ్ళి అలనాటి మాలపిల్ల దగ్గర మొదలై - కాలం మారింది, బలిపీఠం లాంటి సూపర్ హిట్ల మీదుగా చాలా పెద్దప్రయాణమే చేసింది. మనం కూడా సమాంతరంగా కారంచేడు, చుండూరు, నీరుకొండల మీదుగా ఇంకో పెద్దప్రయాణం చేస్తున్నాం!
                           
నేను ఈ ఉదాహరణల్ని సినిమా ప్రభావం సమాజం మీద ఉండదని చెప్పటానికి రాయట్లేదు. ఉంటుందని అన్డానికి తగినంత ఆధారాల్లేవని చెప్పటానికి మాత్రమే రాస్తున్నాను.
                             
సినిమా మన ఈగోని సంతృప్తి పరుస్తుంది. వాస్తవ ప్రపంచంలో మనకున్న తోర్రల్ని పూడ్చి ఆకాశంలో విహరించే ఆదర్శవంతమైన పాత్రల్ని భలే ఇష్టపడతాం. అసలా పాత్ర విలువల పట్ల కనీసం దర్శక రచయితలకే నమ్మకం ఉండదు. ఆదర్శవంతమైన ఆలోచనలు, సాధ్యంకాని కోరికలు, లేని విలువలు ఆపాదించుకోవటానికి డబ్బుతో కొనుక్కునే సాధనం సినిమా.

ఇవ్వాల్టికీ వాస్తవ జీవితంలో కులమతాలు, ఆస్తిఅంతస్తులు చాలా ముఖ్యం. కానీ సినిమాల్లో పడవ నడిపే వ్యక్తి ఆమాయక ప్రేమ (మూగమనసులు), నల్లటివాడి కవితాత్మక ప్రేమకథ (చెల్లెలి కాపురం), పనివాడి మొరటు ఆత్మీయత (ఆత్మబంధువు), రిక్షా కార్మికుని కుటుంబ మమకారాలు (శభాష్ రాముడు) ముచ్చట గొలుపుతయ్. అంటే - నిజ జీవితంలో మనకేది ఉండదో అదే సినిమాల్లో చూసుకుని తృప్తినొందుతాం!
                             
కాబట్టి నా పాయింటేంటంటే - జనం చెడిపోతున్నారని ఎవరూ గుండెలు బాదుకోనక్కర్లేదు. మీరూ నేనూ ఈ జనంలో భాగమే. ఎంత గొప్ప సినిమా చూసినా మీరూ నేనూ ఆవగింజంతైనా బాగుపడనట్లే, ఎవరూ కూడా చెడిపోరు. కాకపోతే తెలుగువాళ్ళల్లో కొందరు మేధావులున్నారు. వాళ్ళు సామాన్య ప్రజల కన్నా పైస్థాయివాళ్ళు కాబట్టి - సినిమాల్లో చెడు చూసి జనాలు చెడిపోతున్నారంటూ స్టేట్మెంట్లు పడేస్తారు! 

పోనీ - చిన్నపిల్లలయినా సినిమా ప్రభావానికి లోనవుతారా? ఇదీ అనుమానమే! గుండమ్మకథ పదిసార్లు చూసిన నా అన్న నన్ను ఎన్టీఆర్ నాగేశ్వర్రావుని చూసినట్లు ఆప్యాయంగా చూసుకోకపోగా, నామీద నాన్నకి పితూరీలు చెప్పి తన్నించేవాడు. 'రక్తసంబంధం'లో తీవ్రమైన అన్నాచెల్లెళ్ళ సెంటిమెంట్ వుంది. సినిమా చూస్తూ హాల్లో కడవల కొద్దీ కన్నీరు కార్చిన అక్క - నేను తన పెన్సిలూ, ఎరేజరు వాడేస్తున్నాని రాక్షసిలా రక్తమొచ్చేట్లు గిచ్చింది. ఆరకంగా మాదీ రక్తసంబంధమైపోయింది! మరి పిల్లల మీద సినిమాల ప్రభావం ఏంటి!?

సినిమాల ప్రభావం ఉండదని నిరూపించడానికి అన్నీ నెగెటివ్ పాయింట్లు రాస్తున్నాను కదూ! కాబట్టి ట్రాక్ మారుస్తా. చిన్నప్పుడు సినిమాలు చూస్తున్నప్పుడు నాకు కొన్ని కోరికలు కలిగేవి. 'శభాష్ రాముడు' చూసి రామారావులా రిక్షా తొక్కుదామనే కోరికతో తహతహలాడాను. కాలేజీకి వచ్చాక నా రిక్షా తొక్కుడు కోరిక తీరింది. 

కొంచెం పెద్దయ్యాక ఏడుపుగొట్టు ఇల్లాళ్ళు నచ్చడం మొదలెట్టారు. మొగుడు 'ఇంకోదాన్తో పోతాను మొర్రో!' అంటున్నా పట్టించుకోకుండా మొగుడిగాడి కాళ్ళమీద పడి భీభత్సంగా కన్నీరుగార్చే పతివ్రతా శిరోమణులు నా మనసు దోచారు. ఆరోజుల్లో నాకు నచ్చిన డైలాగ్ - "ఏవఁండీ! మీ పాదాల దగ్గర ఇంత చోటివ్వండి, కనీసం మీఇంట్లో పనిమనిషిగా ఉండనిస్తూ ఇంత ముద్ద పడెయ్యండి." ఇట్లాంటి సీన్లు చూసినప్పుడల్లా అర్జంటుగా పెళ్లి చేసుకుని ఏడిచే భార్యతో బ్రతిమాలించుకోవాలని తెగ ముచ్చటపడేవాణ్ని. కానీ - పదోక్లాసులో పెళ్లి చేసుకునే సౌలభ్యం, సౌకర్యం లేక ఆగిపొయ్యా! రిక్షా ముచ్చటైతే తీరింది గానీ, ఈ పాదాల దగ్గర చోటు ముచ్చట తీరలేదని ప్రత్యేకంగా రాయడం అనవసరం. 

చివరాకరికి నే చెప్పొచ్చేదేమనగా - సినిమా చూడ్డం అనేది కేవలం కాలక్షేపం మాత్రమే. అది తీసేవాడికీ తెలుసు, చూసేవాడికీ తెలుసు. మరి తెలీన్ది ఎవరికి? 'సినిమాల్లో చెడు ఉండరాదు. బలహీన మనస్తత్వం గలవారు చెడిపోతారు.' అనేవాళ్లకి. ఇంతకీ ఆ చెడిపొయ్యే బలహీన మనస్తత్వ దుర్భలులు ఎక్కడ వుంటారో, ఎలా వుంటారో వాళ్ళు చెప్పరు. అదే తంటా!

(photo courtesy : Google)

30 comments:

  1. రాక్షసిలా రక్తమొచ్చేట్లు గిచ్చేది. ఆ రకంగా మాదీ రక్తసంబంధమే! --- LOL.

    పాదాల చెంత చోటు, ముద్ద పడేయటం :)) అవును.. సినిమాల్లో ఇలాంటి డైలాగులు వినీ,వినీ చిన్నప్పుడు, తెలిసీ తెలియని ఒక ఏజ్ లో నేనూ అలాగే అనుకునేదాన్ని. పెద్దయ్యాక అంతటి పతిభక్తి కలిగి ఉండాలని.

    ReplyDelete
  2. Post చాలా నచ్చింది. చిన్నపిల్లలు ఢిషుం ఢిషుం అని వీధుల్లో కొట్టుకోవడానికీ, దీపావళినాటి దొంగ-పోలీసు ఆటలక్కూడా సినిమాలే ప్రేరణకదా.

    "నిజ జీవితంలో మనకేది ఉండదో అదే సినిమాల్లో చూసుకుని తృప్తి నొందుతాం." సత్యము వచించితిరి.

    అంతా బాగుందికానీ ఇన్నేసి సినిమాల పేర్లు వాడుకొని, వాటన్నింటినీ గుర్తుతెప్పించేసి వాటిని ఎలా సంపాదించాలో మాత్రం చెప్పకపోవడం హెంతమాత్రమూ బాగాలేదు. ఇప్పుడర్జంటుగా నాకు మనుషులు మారాలి torrent లింక్ పంపించండి. లేకపోతే మీబ్లాగుని శపించేస్తాను. :)

    ReplyDelete
  3. ఇంత ముద్ద పడేయండి అంటే రాగి ముద్దేనా? ఆహ్! ఓహ్! వేడి వేడిగా రాగిముద్దలో నెయ్యి వేసుకుని వంకాయ బజ్జీతో తింటుంటే నా సామిరంగా! ఇది తిన్నాక అరగాలంటే, బండెనక బడి కట్టి అని అరుస్తూ గద్దరోడిలా కుప్పిగంతులు వేయాల్సిందే. ఎర్రగారం (వుల్లిపాయ కారం ఒపచ్చడి) కాంబినేషన్ కూడా బాగుంటుంది. మంచి రెసిపి ఏవైనా వుంటే చెబుతారా? :)

    ReplyDelete
  4. హ హ , పాత సినిమాల్లో ఆడపడుచులు విలన్స్ కదా .మా తమ్ముని తో సినిమాల్లో లాగ, వాళ్ళావిడ తో ఇ౦ట్లొ పనులన్నీ చేపిస్తా అని చెప్పినట్లు గుర్తు :)

    ReplyDelete
  5. రమణ గారూ,

    మంచి చర్చ కి తెర తీశారు. ముందు గా మరొక్క మంచి పోస్ట్ కి ధన్యవాదాలు.

    మనస్తత్వ శాస్త్ర వేత్త గా మీరు మంచి కంటే చెడు తొందర గా ప్రభావం చూపుతుంది అని మీరు అంగీకరిస్తారా? ఒక సామాన్యుడు గా నేను అలా అనుకుంటాను. సినిమా లో లంచగొండి గుమస్తా లా లంచం తీసుకోక పోయినా, హీరో లా అమ్మాయిలని అల్లరి చెయ్యాలనే దుగ్ధ చూసిన వారి మీద ఉంటుంది అనుకుంటాను. అక్కడ వారిని వారు, ఆ హీరో తో సమానం గా ఆపాదించుకోవటం వల్ల ఆ భావం వస్తుంది అనుకుంటా..

    అదే హీరో (లేదా వారిని ప్రభావితం చేసిన పాత్ర) చేసే పనికి మాలిన పనులని ఈనాడు విద్యార్థులు చెయ్యడం మనము గమనించ వచ్చు. ఆ హీరొయిన్ లా బట్టలు, మరో హీరొయిన్ లా నడక, జుట్టు, ఇలా ఎన్నెన్నో అనుసరణలు ఈ నాడు కొత్త కాదు. అల నాడు సరోజా దేవి శ్రీ కృష్ణార్జున యుద్ధం సినిమా లో అన్నియ్యా అన్న పాపానికి, ఎంత మంది వాళ్ళ వాళ్ళ అన్నయ్యలని అన్నియ్యా అని ముద్దులు పోయారో ఆ తరాన్ని ప్రత్యక్షము గా చూసిన మీకు తెలిసి ఉంటుంది. నేను చాల మంది దగ్గర విన్నాను, అల్లా పిలిచేవారు అని...

    అలాగే, శివ సినిమా వచ్చిన తరువాత, విశాఖ దగ్గర పెందుర్తి లో ఒక కాలేజీ లో పిల్లలు సైకిలు చైన్లు వాడి కొట్టుకున్నారు, తదనంతరము నాగార్జున గారి ఇంటర్వ్యూ లో శివ లో వాడిన చైన్లా, రబ్బరు వే గా అని ఆయన తోనే చెప్పించారు..

    సినిమా మాస్ మీడియా. ఎంతో ప్రభావము చూపగలదు. మీరు చెప్పినట్లు, మంచి ఎవరూ అనుసరించక పోయినా, చెడు మాత్రము తొందర గా అనుసరించే అవకాశాలు మెండు అని అనుకుంటున్నాను..

    భవదీయుడు
    సీతారామం

    ReplyDelete
  6. పెళ్ళి విషయంలో కులం గురించి ఆలోచించినా ఇతర విషయాలలో ప్రిఫరెన్స్ ఇచ్చేది డబ్బుకే. డబ్బున్నవాడు తన కులానికి చెందిన పేదవాని పక్కన కూర్చోవడానికి కూడా ఒప్పుకోడు. రిజర్వేషన్ల వల్ల ఆర్థికంగా పైకొచ్చిన దళితులైనా సరే తమ కులానికి చెందిన పేదవాళ్ళతో కలిసి ఉండరు. సమాజాన్ని అన్నిటి కంటే ఎక్కువగా ప్రభావితం చేసేది డబ్బు. తమ ఇల్లు చక్కబెట్టుకోవడానికే ప్రాధాన్యత ఇస్తూ సమాజం గురించి ఆలోచించనివాళ్ళు కులం గురించి మాత్రం ఆలోచిస్తారంటే అది నమ్మశక్యం కాని విషయమే.

    ReplyDelete
  7. "నిజ జీవితంలో మనకేది ఉండదో అదే సినిమాల్లో చూసుకుని తృప్తి నొందుతాం." నూటికి నూరుపాళ్ళు నిజం అండి! బాగా వ్రాశారు! మన మానసిక స్థితిని బట్టి కూడా మనకి సినిమాలు నచ్చుతాయేమో అని నా అంచనా! కొంతమందికి ఎవరిమీదయినా విపరీతమయిన కోపం ఉందనుకోండి ఆక్షన్ సినిమాలు ఎక్కువగా చూస్తారు! బహుశా ఆ సినిమాల్లో హీరోలాగా ఊహించేసుకుని విలన్ బదులు ఆ గిట్టని వాళ్ళని ఊహించుకుని మురిసిపోతారు కాబోసు! ఇది కూడా మీరు చెప్పినదానికి సరిపడేదే! మనకి దొరకనిది లేదా మనం చేయలేనిది అందులో చూసుకుని తరిస్తాం.

    ReplyDelete
  8. కృష్ణప్రియ గారు..
    ధన్యవాదాలు.
    చిన్నప్పుడు మనం చాలా అవ్వాలనుకుంటాం కదూ!
    నేనైతే.. సినిమా హాల్లో ఆపరేటర్ అవ్వాలని కలలు కన్నాను.
    చాలామంది పెద్దవాళ్ళు జేబులో అన్నేసి డబ్బులుంచుకుని సినిమాలు చూడకుండా ఇళ్ళల్లో ఎందుకుంటారో అర్ధమయ్యేది కాదు.

    ReplyDelete
  9. Inian Minerva గారు..
    ధన్యవాదాలు.
    అన్ని బొమ్మలు గూగుల్ గాడి దగ్గర్నుండే తీసుకున్నానండి.
    మనుషులు మారాలి సినిమా చూట్టానికి ధైర్యం కావాలి. ఆలోచించుకోండి.
    నేనేదో బుర్ర లోకొచ్చిన ఒకట్రెండు పాయింట్లు సాగదీసి రాస్తున్నాను.
    మీరు నన్నిలా శపించబూనుట పాడియా?

    ReplyDelete
  10. SNKR గారు..
    ధన్యవాదాలు.
    మీరు ముద్ద గూర్చి బాగా రాశారు.
    సారీ.. నా దగ్గర రెసిపి ఏమీ లేదు.

    ReplyDelete
  11. Mauli గారు..
    ధన్యవాదాలు.
    ఆడపడుచులు సపోర్టింగ్ విలన్లు మాత్రమే!
    మెయిన్ విలన్ ఎప్పుడూ అత్తే.. సూర్యాకాంతం.

    ReplyDelete
  12. <>
    మీకసలు రోజు రోజుకీ ధైర్యం ఎక్కువైపోతుంది....ముందు మేడం గారి అడ్రెస్ చెప్పండి. అసలు భయం అనేది లేకుండా పోతుంది.

    ReplyDelete
  13. Seetharam గారు..
    ధన్యవాదాలు.
    సినిమాల వల్ల సమాజానికి లాభం జరగనప్పుడు నష్టం ఎట్లా జరుగుతుంది? అన్న హైపథిసిస్ తో సరదాగా రాశాను.
    చెత్త సినిమాల వల్ల సమాజానికి ఖచ్చితంగా నష్టం జరుగుతుంది. కానీ ఏ మేరకు?
    సమాజం అనేది అనేక వ్యక్తుల, అనేక ఆలోచనల సమాహారం.
    కొంత మంది ఆలోచనలు అందరికీ ఆపాదించలేం.
    ఉదాహరణకి.. ఒక సినిమాలో ఒక అంధురాల్ని విక్టిం చేస్తూ ఒక రేప్ సన్నివేశం చిత్రీకరించబడింది అనుకుందాం. తొంభై తొమ్మిది మంది అయ్యో పాపం! అనుకున్నా.. ఒక్కడు 'ఇదేదో బాగుందే.' అనుకుంటే ఆ మేరకు సమాజానికి నష్టం. ఆ ఒక్కడు కూడా లేకపోతే చాలా సంతోషిస్తాను. ఇంతకీ వాడు ఒక్కడేనా? పది మందా? అన్న పరిశోధన జరగలేదు. ఏటా మలేరియాతో లక్షల మంది చచ్చే నిర్భాగ్యులం. ఇట్లాంటి సున్నిత అంశాలపై స్టడీ చెయ్యటానికి మనకి వనరులు లేవు. అందుకే మన సామాజికాంశాల చర్చ ఎక్కువగా సబ్జక్టివ్ గానే సాగుతుంది.
    సీతారాం గారు..
    ఒక విజ్ఞప్తి.
    నేను బ్లాగుల్లో సరదాగా రాస్తాను. సరదాగానే తీసుకోండి. సరదా కోసం నా అభిప్రాయాలకి భిన్నంగా కూడా రాస్తుంటాను.
    మీ చివరి పేరాగ్రాఫ్ పూర్తిగా ఒప్పుకుంటున్నాను.

    ReplyDelete
  14. ప్రవీణ్ శర్మ గారు..
    ధన్యవాదాలు.
    మీరు చెప్పింది ఒప్పుకుంటున్నాను.
    కానీ.. అందరూ కాదేమో!

    ReplyDelete
  15. రసజ్ఞ గారు..
    ధన్యవాదాలు.
    మీరు నా టపాకి చక్కని పాయింట్ కలిపారు.
    నేనీ పాయింట్ మిస్ అయ్యాను.
    థాంక్యూ!

    ReplyDelete
  16. నీహారిక గారు..
    థాంక్యూ.
    ఆవిడ ఎడ్రెస్ నోట్ చేసుకోండి.
    * ^ % $ # @ *%^
    నోట్ చేసుకున్నారుగా!
    మీరు ఎప్పుడైనా కలుసుకోవచ్చు.

    ReplyDelete
  17. తమ ఇల్లు చక్కబెట్టుకోవడానికే ప్రాధాన్యత ఇస్తూ సమాజం గురించి ఆలోచించనివాళ్ళు కులం గురించి మాత్రం ఆలోచిస్తారని అనుకోను. వాళ్ళు కులం పేరు చెప్పుకున్నా దానికి అంత ప్రాధాన్యత ఇస్తారని నేను అనుకోను. అగ్రకులాలవాళ్ళైతే individual prestige (వ్యక్తిగత గొప్పతనం) కోసమో, దళితులైతే రిజర్వేషన్ కోసమో కులం పేరు చెప్పుకోవడం జరుగుతుంది. కులాంతర వివాహాలు చేసుకునేవాళ్ళని కొందరిని చూశాను. సంప్రదాయం ఒప్పుకోకపోయినా కులాంతర వివాహాలు చేసుకునేవాళ్ళు కొందరు ఉంటారు. కులానికీ, భౌతిక నియతికీ సంబంధం లేదు. కులం గురించి ఆలోచించకుండా ఉంటే ఏ కులంవాళ్ళు ఏ కులంవాళ్ళని కులాంతర వివాహం చేసుకున్నా సుఖంగా ఉండగలరు.

    ReplyDelete
  18. ప్రవీణ్ శర్మ గారు..
    ధన్యవాదాలు.
    నా టపా సినిమాలకి సంబంధించినది.
    సామాజిక అంశాల పట్ల మీకు గల ఆసక్తి అభినందనీయం.
    కులం పట్ల మీ అభిప్రాయాలని గౌరవిస్తున్నాను.

    ReplyDelete
  19. కులానికీ, భౌతిక నియతికీ సంబంధం లేదు అని ఒప్పుకుంటే కులాంతర వివాహాలని సినిమాలకే ఎందుకు పరిమితం చెయ్యాలి? మీరు సినిమాలకే పరిమితం అన్నట్టు వ్రాసారు కాబట్టి నేను సమాధానం వ్రాసాను, అంతే. మీరు సినిమాల గురించి వ్రాసారని తెలియక కాదు.

    ReplyDelete
  20. బాబుగారూ (భుజం మీద తువ్వాలుతో ఆనంద భాష్పాలను ఆర్ద్రంగా తుడుచుకుంటూ) మీరు పోస్ట్ బాగా రాశారు బాబుగారూ. మీరు ఇలాంటి పోస్టులు ఇంకా చాలా, ఎన్నో, ఎన్నెన్నో రాయాలి బాబుగారూ రాయాలి.

    "అర్జంటుగా పెళ్లి చేసుకుని ఏడిచే భార్యతో బ్రతిమాలించుకోవాలని తెగ ముచ్చట పడేవాణ్ని."
    సినిమాలలో చూపించేవన్నీ నిజం కాదని, భార్య అంటే ఏడిపించేదే కానీ ఏడ్చేది కాదని నాకు పెళ్ళయిన తరువాతే తెలిసింది :)))))

    ReplyDelete
  21. SHAKAR.S గారు..
    హా.. హా.. హా..
    అద్దర గొట్టేశారు!
    థాంక్యూ.

    ReplyDelete
  22. ప్రవీణ్ శర్మ గారు..
    సారీ.

    ReplyDelete
  23. " 'రక్త సంబంధం' లాంటి సెంటిమెంట్ సినిమాలు టన్నుల కొద్దీ చూసి.. కడవల కొద్దీ కన్నీరు కార్చే అక్క.. జాలీ, దయ లేకుండా.. నేను తన పెన్సిలూ, ఎరేజరు వాడేస్తున్నాని రాక్షసిలా రక్తమొచ్చేట్లు గిచ్చేది. ఆ రకంగా మాదీ రక్తసంబంధమే.." సూపరు..... "అర్జంటుగా పెళ్లి చేసుకుని ఏడిచే భార్యతో బ్రతిమాలించుకోవాలని తెగ ముచ్చట పడేవాణ్ని. " ఇంకో మచ్చుతునక...

    ReplyDelete
  24. harephala గారు..
    ధన్యవాదాలు.

    ReplyDelete
  25. This comment has been removed by the author.

    ReplyDelete
  26. ఏమండి మీరు దయ చేసి తప్పుగా అనుకోకండే నా comment చూసి
    ఎంచేతనంటే ఇది మీకు మీ భావానికి విరుద్ధం లా కనిపించిన 100 % మీ వాదన కు ఉపకరిస్తుంది

    కొంచం try to under stand me :

    అసలు మీరు "ఉండదు" అనేది ఉంటె చెప్పరా లేకుంటే చెప్పరా?
    ఇది "ఉండదు" ఇది "లేదు" అని చెప్పలేం
    (ఇది సత్యం సుమ!)
    వ్యావహారికం లో ఎలా ఉందంటే అమ్మ బియ్యం డబ్బాలో లడ్డు పెట్టింది
    తమ్ముడు తినేసాడు అనుకుంట ఇప్పుడది లేదు
    ఇప్పుడు లేదు అంటే ఎప్పుడో ఉండనే అర్థం కదా !

    సరే ఇంకోల చెప్పాలనే ఒక విధంగా సినిమాల ప్రభావం లేదు అన్నారు
    అలాకాక మరోల ఉన్డోచు.

    ఉదాహరణకు సినిమాలు అదే TV లో వస్తాయి వార్తలు అదే టీవీ లో వస్తాయి
    ఇప్పుడు ఏమైందంటే జనాలు వాస్తవానికి దూరంగా ఉన్నారు
    సినిమా చూసేంత వరకు నిజమని ఫీల్ అయ్యి బయటకు వచ్చాక ఇది సినిమా అంటే కానీ నిజం కాదు అనుకుంటారు
    సినిమా చూస్తున్నంత సేపు అదే నిజమే అన్న ఫీల్ తో హీరో విలన్ ని కొడితే కొట్టు "నరుకు నా కొడుకును " అని మనసులో అనుకుంటారు
    కాని
    నేటి పరిస్థితి వాటి ప్రభావం ఎలా ఉందంటే నిజాన్ని కూడా సినిమా ల చూసేలా తయారయ్యింది సమాజం
    ఈ సకల జనుల సమ్మె ఆగతానికి కూడా అదే మూల కారణం
    ఎంచేతంటే సమ్మె వల్ల కొమ్పలన్తుకున్తున్నాయి అని Media గగ్గోలు పెడుతున్న
    అది చూస్తున్నంత సేపే దాని ప్రభావానికి లోనై తర్వాత దానిని పట్టించుకోవటం లేదు
    అదెంత పెద్ద విషయమైన సరే
    కారణం సినిమాల ప్రభావం
    ఇది నిజం లా చూస్తే కదా లాభమా నష్టమా అసలు ఎం జరుగుతోంది ? అని ఆలోచించేందుకు
    ఇది కూడా సినిమాల చూస్తున్నారు కాబట్టే రాష్ట్రం seen ఇలా ఉంది.
    సినిమా తనదైన శైలిలో ఒక ఆదర్శాన్ని అలవరచుకునేల ప్రభావితం చేయక పోయినా

    "మిధ్య దృష్టి" ని ప్రసాదించి

    ఆరకంగా సర్వులను ప్రభావితం చేసింది
    ఇది ఏదో ఒక సినిమా వలన కలిగిన ప్రభావం కాదు
    సమిష్టి సినిమాల వలెనే సాధ్యమయ్యింది .

    ఈ మధ్య release అయిన Darling movie చూస్తే 1st half అంత అబద్ధమే
    అని Interval లో బోర్డు వేస్తారు
    నిజానికి 2nd half ఏదో నిజంగా నిజం అయినట్టు .... పెద్ద
    ఇది సినిమా చరిత్రలో ఒక వినూత్న ప్రయోగం success అయ్యింది కానీ సారం ఎవరు గ్రహించల
    ఎంజాయ్ చేసి ఊరుకున్నారు అంతే !!

    దూకుడు కూడా same ! నాన్న కోసం లేని జగత్తు సృష్టిస్తాడు తనయుడు ... Good By లెనిన్ లో లాగా
    నిజానికి అది అబద్ధం లో అబద్ధం అన్నమాట ....

    ఆ మధ్య Inception అని ఒక మూవీ వచ్చింది simple గా చెప్పాలి అంటే
    " కలలో కలలో కల ...." ఇదే కదా ....

    సో సినిమా ప్రభావం లేక పోలేదు కాని అది చెప్పే రీతిలో కాక మనం తీసుకునే రీతిలో ఉన్నది ఆ ప్రభావం

    నైస్ awesome article రాసారు బాగుంది

    నా comment నచ్చక పోయిన అర్థం కాక పోయిన తిట్టుకోకండి pls

    మీరు అంత సుందరంగా విశ్లేషణ చేస్తే అది చూసి స్పందించిన నా హృదయం ఇలా పలికింది

    nice to మీట్ u like this

    ReplyDelete
  27. @ఎందుకో ఏమో?..
    మంచి కామెంట్ రాశారు.
    ధన్యవాదాలు.
    మన సమాజం లో సినిమా, టీవీల ప్రభావం బాగానే ఉంది.
    మీ అభిప్రాయాలని పూర్తిగా ఒప్పుకుంటున్నాను.
    ఒక చిన్న ఆలోచనని ఒక టపాగా.. సరదాగా రాశాను.
    అంతే!

    ReplyDelete
  28. Good write up with good sense of humor.

    More than 'change in charecter', I think cinema can have influence on culture. 'Sutti' ane padaniki Jhandyala gari oka cinema arthanne marchesindi. 'Nee yenkamma', 'Anta scene ledu' anepadalu dadapu anni age groupla vallu vaadutaru. Gharshana (Venkatesh di) cinema lo heroine MSc IIT ani anadam chusi, appudu IIT lo MSc vuntundi ani telsukoni maa jillaa gaade okatanu, entrence test lo All India first vachadu. Ganesh (Idi kuda Venkatesh de) movie lo Madhubala ni Venkatesh valla sister 'Akka..' ani pilustundi. But Madhubala- Venky appudappudu vallu love lo padatamemo ani matladukuntaru. Ide point ni maa friend raise chesi, 'Oka ammay mee akkani sister anna anta matrana, tanaki nee meeda sodara bhavam vunnattu kadu' ani cheppadu.

    Alantidi.. samaajam meeda cinemala prabhavam. Kaani, manushula charecters marche antala (chedu ga kaani, manchiga kaani)vuntundi cinema prabhavam ani nenu anukonu.

    Thanks for bringing this topic.

    ReplyDelete
  29. ఈమధ్యే మీ బ్లాగును చదవడం జరిగింది. అందరికీ తెలిసిన విషయాలే అయినా సరళంగా, సటైర్ ను జోడించి, చురకలు వేస్తూ, వ్రాస్తునారు. నన్ను నేను మరిచి పెద్దగా నవ్వడం చూసి మావారు నన్ను కొంచెం విచిత్రంగా, ఒకింత భయంగా చూసారు. ముఖ్యంగా మిరపకాయల బజ్జీ ప్రహసనం, సినిమాలు మంచివేగాని అన్న ఆర్టికల్స్ నాకు చాలా నచ్చాయి. సినిమాలల్లో, సీరియల్స్ లో వచ్చే సంభాషణలు ఎంత జుగుప్సను కలిగిస్తున్నాయంటే అలా మాట్లాడే మనుషులను భరించలేం. చెడు ఆకర్షించినట్లు మంచి ఆకర్షించదు.

    --
    Gowri Kirubanandan

    ReplyDelete

comments will be moderated, will take sometime to appear.